Ua sauni le susuga Papalii John Taimalelagi Afele i luitau o lona toe valaauina e avea ma faauluuluga o le Matagaluega o Faamasinoga ma le Faafoeina o Mataupu tau faamasinoga, ina ua mae’a ona faamaonia ai e le Kapeneta lona filifilia e ala i se faasalalauga i le Aso Lulu o le vaiaso nei na faailoa ai ma le filifilia o le Loia Sili a le Malo ma le Ofisa Sili o le pulega o Tusipasi ma Faailoga Taualoa a Samoa.
I se fesootaiga ma le susuga Papalii i fesootaiga faaonaponei, na ia faafetaia ai le Palemia ma minisita o le Kapeneta aemaise le komisi o galuega a le Malo i le toe filifilia o lona tagata aemaise o le faatuatuaga na te tauave ai le tofiga i le tuanai o ni tausaga sa avea ai ma faauluuluga ae na faamuta i se faaiuga a le Kapeneta a le faigamalo ua tuanai.
Se vaega o le faatalanoaga ma le susuga Papalii John Taimalelagi Afele ua filifilia e toe avea ma Ofisa Sili o le pulega o le Matagaluega o Faamasinoga ma le Faafoeina o Mataupu Tau Faamasinoga.
O le mae’a o aso fiafia o le Kerisimasi ma le Tausaga Fou o le a ia tuua ai Niu Sila ae toe foi mai i Samoa e tauave ona tiute.
