Ua manino mai nisi vaega o le faaiuga a le ICAC le anti-corruption watchdog poo le ofisa a Ausetalia e feagai ma suesuega i faiga lē sa’o, i le latou suesuega agai i lē sa avea ma Premier o Niu Sa Uelese i se taimi e lei mamao atu o Gladys Berejiklian ma le isi sa avea ma faipule o le faaitu o Wagga Wagga, Daryl Maguire ma ua faailoa mai ua maua e iai faamaoniga o amioga ogaoga lē sa’o sa faatinoina.
Sa faatalitalia e le aufaasalalau le iuga o lea suesuega aemaise sa faatoa ta’utino ai Berejiklian i le la faigauo faalilolilo ma Maguire a o ia umia le tofi o le Premier o le setete.
O se vaega o le lipoti ua ta’ua ai sa solia e Berejiklian le faatuatuaga o tagata lautele i le 2016 ma le 2017 i nisi o faaputugatupe sa ia tuuina pe folafola foi i ni poloketi se lua sa unaia malosi e Maguire.
Ua maua i lea suesuega sa ioeina e Berejiklian ia vaegatupe e aunoa ma se faailoaina o le la sootaga ma Maguire.
E le o iai se fautuaga a le ICAC poo le Komisi lea e molia ai Berejiklian i ana amioga le talafeagai ma solitulafono sa faatino ae ua fautuaina le tuuina atu o Maguire ma nisi e toalua sa o latou galulue faatasi i le DPP poo le Director of Public Prosecution e iloilo ai le faia o ni moliaga faasolitulafono.
