Ua faailoa le faai’uga a le coroner i le su’esu’ega sa faia i le maliu o se teine a’oga o le Iunivesite o Otago 19 tausaga o Sophia Crestani i se patī sa faia i le flat mo tamaiti a’oga i Dunedin i le 2019.
Ua faailoa ai e le coroner o Heather McKenzie o se tulaga faanoanoa le tula’i mai o lenei faalavelave ae o se mea e mafai ona alofia.
Fai mai o le mafuaaga o le maliu o le crush asphyxia i le faaperetania, e mafua ina ua malosi le pressure i le fatafata ma ua lē mafai ai ona mānava e pei ona masani ai, ma e manatu le coroner sa iai sina avanoa pe ā ma le ‘afa itula sa tatau ona maua ai se lavea’i ma faasaoina ai le ola o sia teine talavou.
Sa faitioina e le coroner ē na talimalo i le pati lea, e lē o mafai ona faailoa igoa, ae fai mai le coroner sa tatau ona o latou silasila lelei i le faafoeina o lea fiafia aemaise i le saogalemu o tagata e auai ai.
Na ta’ua foi e le coroner sa tatau i le Iunivesite o Otago ona silasila i le faatino lelei o ni faiga e a’oa’oina ai tamaiti a’oga sa aofia i le pati lea i le 2019.
Saunoa le tina o le teine a’oga ua maliu e fia vaai ua sui se isi tulaga ua iai i tamaiti a’oga ma faiga pati ia e tumutumu ma soona tagofia ai le ‘ava malosi, ma ua tatau ona faatulaga lelei ni tulafono e faatatau i amioga faapea.
Puna o Faamatalaga: https://www.rnz.co.nz/news/national/530114/sophia-crestani-coroner-finds-death-of-student-at-dunedin-flat-likely-preventable
