Ua faatino nei e le Matagaluega o Leoleo, Falepuipui ma le Ola Toe Fuataina, se polokalame e faaaoga ai fesootaiga televavave e pei o le api o foliga, e ave ma momoli ai se faalauiloa e ala i ni fautuaga e tau fofo ai lea faaletonu, ua matauina e le matagaluega le saoasaoa o le siitia o mataupu faapea i lenei tausaga, e faatusa i le tausaga na tea nei.
O faamaumauga o le 2021 mai le masina o Ianuari e oo ia Tesema e 15 mataupu tau pule i le ola sa lipotia ma faamauina e leoleo, peitai o le tausaga nei mai le masina o Ianuari e oo mai i le masina na tea nei o Aokuso, e 15 foi mataupu faapea, ae toe fa masina mae’a lenei tausaga.
O le uluai polokalame a le matagaluega na faailoa ai le maua o le fesoasoani ini fautuaga mo e ua mafaufauina se tulaga faapea, i auaunaga tumaoti o loo iai i latou ua aoaoina lelei mo le faia o lea fesoasoani.
O faamaumauga ua faailoa e le matagaluega mai lea polokalame e le o faailoaina ai, pe toafia alii fia tamaitai ae o le latou matutua ua fano ola ma soifua ona o lea tulaga mai le tausaga na tea nei e oo mai i le 8 masina ua mae’a o le tausaga nei.
