O le tagata pito matua o se tama tane ua 59 tausaga o le soifua o loo aofia i le 54 o tagata o loo nofo taofia nei i le falepuipui i Tanumalala e faatali Fepuari o le tausaga fou e tutula’i ai i le Faamasinoga Maualuga ona o moliaga e fesoota’i i solitulafono tau i fuālaau faasāina.
O le tagata pito laitiiti o loo taofia mai lea aofa’iga e 54, o se alii 15 tausaga le matua o loo taofia uma ma ona mātua i le mae’a o osofa’iga a leoleo na sa’ilia ai fale ma nofoaga sa masalomia o loo tulei ai le ‘aisa ma maruana.
E to’a 11 tama’ita’i o loo taofia ai foi ae 43 alii, ae o tama’ita’i o le tagata matua o se tinā ua 49 tausaga ae o le tama’ita’i e laitiiti tausaga e 19.
Ua faailoa lautele e leoleo ata o i latou uma ia ma faamatalaga i o latou nuu i luga o le upega tafa’ilagi a le matāgaluega o leoleo, falepuipui ma le toe fuata’ina.
O le feiloa’iga a le Sui Komesina o le matāgaluega ma tusitala na faailoa ai o soo se tagata lava e maua atu i le nofoaga o loo autū iai se osofa’iga o fuālaau faasāina e pu’eina uma ma ave e taofia mo su’esu’ega.
O osofa’iga talu ai nei a leoleo ua faamuta ai le tautua a se leoleo poo se malu o le malo, ona ua maua i sa’ili’iliga sa ia logo i tagata e faamautū i se nofoaga sa fuafua e aga’i iai le sa’iliga, le osofa’iga o le a alu atu a leoleo.
O lea tulaga ua faailoa ai e le Sui Komesina susuga Leiataualesa Samuelu Afamasaga, e leai se avanoa e toe faafaigaluega ai se leoleo e faamaonia na te ta’u ma faailoa se osofa’iga e sa’ilia ai fuālaau faasāina.
