Ua faailoa e le pulega o le auaunaga ua ta’ua o le TSS Group i se feiloaiga ma le silia i le toaselau o tagata i Samoa ua faamanuiaina talosaga nofomau i Niu Sila, le tāua o le avanoa ua latou sailia ai galuega ae ia tausisia tuuga tala ma kamupani ua ofoina mai ai avanoa faigaluega.
Ua faaalia e se tasi o faauluuluga o lea auaunaga i Niu Sila o loo i Samoa ma se tasi o ofisa sinia e faatalanoa aiaiga o pepa faigaluega, le afioga Silialaei Tala Burgess, e naunau le TSS Group e fesoasoani e aunoa ma se totogi o pepa faigaluega, ae o le faamaoni o le itu tāua lea, ia i latou o le a maua pepa faigaluega o le a galulue ai i kamupani ua maua ai pepa faigaluega, e ui e le o iai se aiaiga o pepa faigaluega i se taimi e tatau ona galulue ai, ona toe saili lea o se galuega ina ua faamautu i Niu Sila se aiga poo se tagata ua manuia lana talosaga nofomau ma ua maua le pepa faigaluega.
Ua na o galuega ua ofoina e pisinisi ma kamupani i Aukilani i Saute e agavaa iai talosaga ua laki i le nofomau o loo sailia e le TSS Group.
Se faatalanoaga ma se tasi o sui sinia o le TSS Group le afioga Silialaei Tala Burgess.
O le faamalamalamaina o lea auaunaga ma le latou fesoasoani e saili pepa faigaluega e aunoa ma se totogi, o le a oo atu i Salelologa i Savaii i le ogatotonu o le vaiaso nei, pe a mae’a feiloaiga ma faatalanoaga ma i latou ua manuia i le Se’i o le nofomau i le motu o Upolu.
