A o tālia se taimi e mae’a ai le suesuega a leoleo ma tuuina atu se lipoti i le Kapeneta e tusa o le mataupu i le vaa na sau mai Amerika Samoa ma se uta mo se faalavelave o se maliu ae leai ni pepa e faataga ai ona uia ogasami o Samoa Tutoatasi, ua ave le tuualalo a le taitai o le vaega e puipuia aiātatau a tagata o loo agaia le Malo, i le tatau lea i le faigamalo ona faia se komisi suesue.
I le feiloaiga masani ma tusitala i le Aso Tofi o lenei vaiaso lea sa faasalalau i auala o fesootaiga le api o foliga, na faailoa ai lea finagalo o le taitai, susuga Tuilaepa L Sailele Malielegaoi ina ua fesiligia i lea feiloaiga.
O le faia o se komisi suesue na faaalia e Tuilaepa e maua ai le sa’o tonu o le mataupu ma iloa ai foi poo iai ni aafiaga o tagata o loo laumanu’ia i le sau o le vaa e aunoa ma ni pepa.
Sa toe faamanatu ai e Tuilaepa a o avea ma Palemia, le mataupu na tuuaia ai le kapeteni o le vaaleoleo o le Nafanua ma le Komesina o leoleo i le aumaia o ni laau malosi mai Amerika Samoa i luga o le vaaleoleo e aunoa ma se pemita faataga.
Na faia ai le komisi suesue i le tausaga e 2008 ma faamaonia ai le solia e le komesina ma le kapeteni i lena taimi o o la tiute fai faaletulafono i le aumaia o ia aupega i se auala solitulafono.
Na fautuaina ai e lena komisi suesue le faapa’ū o tulaga faaleoleo poo le rank o le kapeteni ae ia faia se suesuega faasolitulafono poo se criminal investigation i aafiaga o le kapeteni ma le komesina o leoleo. Peitai e lei faaaogaina lea fautuaga e le Kapeneta sa iai i lena vaitau.
Ua faafetaia e le taitai o le vaega e puipuia aiātatau a tagata poo le itu agai, i le finagalo o le tamaitai Palemia na tali ai i se fesili i le feiloaiga ma tusitala i le Aso Tofi na tea nei, i lona faapea mai, sa tatau ona loka le vaa ma le auvaa ina ua taunuu i Samoa pe afai e leai ni pepa e tusa ma ala faaletulafono.
