Ua faailoa e le sui taitaifono o le Komiti o le Fono Faavae a le Itumalo o Lepa mo le poloketi o le tasi le miliona tala, le tofa Auelua Taito Lealasola Samuelu Enari, le mae’a faamautu ai o le ofisa tutotonu ua lisi ai e le itumalo le maota o le Ekalesia Faapotopotoga Kerisiano i Lepa, ma ua faaaoga ai le $96,000 mo le totogi o le lisi mo le 4 tausaga.
O le isi tupe ua vaevae mo atina’e a afioaga o le itumalo e pei o le ta’i $24,000 mo Saleapaga, Siupapa ma Lepa. Peitai ua faamatuu ese mai ai i le 24 afe lea le tai afe tala a afioaga nei e tolu e avea o se latou sao i le totogiina o le lisi o le ofisa tutotonu o le poloketi.
O le isi seleni o le 200 afe ua toe faaleleia ai le ofisa tutotonu, ma faatau ai meaafale ma masini computers ma ea malulu.
Ua faailoa le faaaogaina o lea tupe faavae o le fuafuaga a le Malo e le sui taitaifono, e tali ai i se finagalo o le Minisita o Faatoaga ma Faiga Faiva o se tasi o sui o le komiti le steering committee o le poloketi tasi le miliona tala, na faailoa ai le tufa e lea itumalo o le luaselau afe, ae leai se aiaiga faapea o le taiala o le faaaogaina o seleni mo le atina’e auā le manuia o tagata o itumalo faapalota e 51 o le atunuu.
Se faatalanoaga ma le sui taitaifono o le Komiti o le Fono Faavae a le Itumalo o Lepa, le tofa Auelua Taito Lealasola Samuelu Enari.
