A o amata savali le masina o Iuni ma faaauau pea ona malaga mai le toatele o tulisi faapea tagata o le tatou atunuu e tafafao mai ma faatasi ma aiga i faalavelave masani, o lea ua faailoa e le pulega o le kamupani vaalele a Ausetalia le Qantas, suiga o ana malaga mo Samoa i le masina fou o Iulai.
Ua faailoa e lea kamupani vaalele e amata i le masina fou ona tasi le malaga e agai mai i Samoa ae o le a le toe lua malaga e pei ona iai i le taimi nei.
O le na o le malaga mai Perisipeni, ae le toe faia le malaga mai le aai o Sini, ma e le o faailoaina e le kamupani vaalele le mafuaaga, peitai ua faailoa e le Qantas o malaga uma mai isi setete o Ausetalia e mafai ona afea Samoa i le faia o avanoa agai i le malaga mai Perisipeni.
O le isi kamupani vaalele le Virgin Australia o loo tumau ana malaga tuusa’o e lua lea e tasi mai Sini ma le isi mai Perisipeni.
