O Savaii o le nofoaga muamua na tomua ai le lisi ina ua faailoa e le Peresitene a le Ekalesia ia Russell M.Nelson le fuafuaga o le a fausia ai Malumalu a le Ekalesia i nofoaga e 20 e atoa ai le 335 o Malumalu a le Ekalesia i le lalolagi.

I faamatalaga mai le ofisa faasalalau a le Ekalesia, o lenei faasilasilaga na faia lea ina ua faamae’a le saunoaga a le Peresitene i se Koneferenisi a le Ekalesia o lenei masina.

O Malumalu nei e aofia ai Savaii, Cancun Mexico, Piura Peru, Huancayo Peru, Vina del Mr Chile, Goiania Brazil, Joao Pessoa Brazil, Calabar Nigeria, Cape Coast Ghana, Luanda Angola, Mbuji-Mayi Democratic Republic of Congo, Laoag Phillipines, Osaka Japan, Kahului Maui Hawaii, Fairbanks Alaska, Vancouver Washington, Colorado Springs, Tulsa Oklahoma, Roanoke Virginia ma Ulaanbaatar Mongolia.

Na ta’ua e le Peresitene i lana saunoaga, “O le tele o lou taimi i le Malumalu e fausia ai le mauaa o lou faatuatua, o lau tautua aemaise o le loto tapuai ma ia faamuamua le Atua i soo se mea.

“E ao ona tatou faaauau ona fausia Malumalu nei e avea ma nofoaga e paia ma avea o se vaega o o tatou olaga tuputupu a’e.”

O le Malumalu o le a fausia i le motu tele i Salafai o le lona lua ai lea o Malumalu i Samoa nei e pei ona iai le Malumalu i Pesega lea na faavaeina i le tausaga 1983 ma toe faaleleia i le 2005.