Ua faailoa e le Ofisa Sili o pulega o le matagaluega o tiute ma tupe maua le afioga Fonoti Talaitupu Li’a le faataotoga mai o le mataupu i le laisene pisinisi o le kamupani o le Tatiana Investments o loo faagaioia le fale kalapu o le RSA ma le faleaiga o le ROSA café and restaurant, ma mafuaaga o le lē toe faafouina o le laisene pisinisi aemaise le laisene o le avamalosi.
O se sasi o le Matagaluega e pei ona faailoa e Fonoti i se pepa o faamatalaga faalauaitele na mafua ai ona faamatuu le laisene o le pisinisi i le masina o Me, ae o loo iai vaega e manaomia e lei tausisia e pei o le pepa o le maliega o le lisi o le fanua ma le fale mai ē e ana ia meatotino.
O se vaega o le pepa o faamatalaga mai le Ofisa Sili o le matagaluega o tiute ma tupe maua e faitauina faapenei:
“E lei mafai ona tuuina mai e le Kamupani se lisi faatasi ma lana talosaga, ae na tuuina mai le kopi o le tusi mai i le Matagaluega o Puna’oa Faalenatura ma le Siosiomaga o loo iai le aso o le masina o Me 2019, e lagolagoina ai le talosagaina mo le faafouina o le laisene pisinisi. O se lape i le matafaioi a le Matagaluega, i lana iloiloga le mata’ituina o le talosaga sa tuuina mai na afua ai ona faamaonia ma tuuina atu le laisene pisinisi a lenei Kamupani i le amataga o le masina o Me 2023”.
3. Na toe lāgā lenei mataupu, i se iloiloga na faatinoina mo talosaga uma na tuuina mai lisi ma pepa faamaonia faaletulafono, na afua ai ona matauina e le Matagaluega e lei tuuina mai e le Kamupani o loo ta’ua, se maliega poo se faamaoniga faaletulafono o le lisiina o le fanua o loo faatinoina ai le pisinisi, e lagolagoina ai le talosaga.
4. E tusa o le aso 8 o Iuni 2023, na logoina ai le Kamupani i se tusi mai i le Matagaluega e faailoa ai lenei vaega ma logoina ai le Kamupani i le iai lea o le avanoa e ono faalēaogaina ai lana laisene pisinisi ua mae’a ona tuuina atu, pe a lē mafai ona tuuina mai faamatalaga ma pepa faamaonia e moomia. Ma sa tuuina iai aso e 7 e tuuina mai ai le maliega faaletulafono o le lisiina o le fanua o loo faatinoina ai le pisinisi. I le mae’a ai o le 7 aso muamua lea, e lei maua mai se tali a le Kamupani i lenei mataupu.
5. E tusa o le aso 21 o Iuni 2023, na tuuina atu ai loa le fautuaga a le Matagaluea o Tiute ma Tupe Maua i le Minisita o Tupe, e faatatau i lenei mataupu ma faailoa ai le tulaga o le lē usitaia e lenei Kamupani o faiga faavae ma le tulafono ma ua alaga tatau ona faalēaogaina loa lana laisene pisinisi. I le aso 4 o Iulai 2023, na sainia ai e le Minisita o Tupe le poloaiga (Notice) mo le faalēaogaina o le pisinisi laisene ma tuuina atu loa i le Kamupani i lea lava aso mo le umi e 7 aso faigaluega, e tali mai ai i lenei poloaiga.
6. Na tuuina atu le poloaiga lona lua e faalēaogaina le laisene pisinisi i le Faatonu o le Kamupani, le susuga ia Afoa Amituana’i Faleulu Mauli e tusa o le aso 19 o Iulai 2023. Sa faatinoina ai loa galuega a le Matagaluega e tusa ai ma le tapuniaina o le fale kalapu ona ua faaleaogaina le laisene pisinisi. Sa logoina e le Kamupani e le Matagaluega o Tiute ma Tupe Maua i le aso 27 o Iulai 2023, o loo ua galulue ma le Matagaluega o Puna’oa Faalenatura ma le Siosiomaga e faamae’a le faatinoina o le lisi faaletulafono, ma talosagaina ai le taimi e 30 aso e faatino ma faamae’a ai lenei faatalatalanoaga. Na saili fesoasoani le Matagaluega i le Ofisa o le Loai Sili e tusa ai ma le talosaga a le Kamupani. E lei taliaina e le Matagaluega le talosaga, ma sa faailoa uma foi i ai mafuaaga ua lē taliaina ai le talosaga i le tusi na ave i le Kamupani i le aso 3 o Aukuso 2023, e aofia ai ma isi pisinisi (Rosa Café & Faleaiga) o loo faatinoina uma i totonu o le fale.
7. E lē gata i lea, na fautuaina foi e le Matagaluega o Tiute ma Tupe Maua, le Pulega Faatonu e Fua Tatau ai Ava Malosi i lana fonotaga sa faatinoina ia Iuni 2023, le taofia o le talosaga mo le faafouina o le laisene o le ava malosi a le Kamupani o loo ta’ua, ona o atugaluga e faatatau i le faafouina o le pisinisi laisene e pei ona ta’ua muamua.
