O le faamanatuina e le ofisa o le tiute o le aso faavaomalo o lenei tausaga e faatatau i le tāua o galuega a le tiute e aofia ai le leoina ia malu tuaoi o atunuu, ua ave ai le lu’itau a le Minisita o le Matagaluega o Tiute ma Tupe Maua i le pulega ma le aufaigaluega o le tiute e tatau ona silasila iai i galuega o lenei tausaga fou.
Faaalia e le Minisita le afioga Tuala Tevaga Iosefo Ponifasio i lana saunoaga i le aso faavaomalo o ofisa o tiute, o lana lu’itau i le tamaitai ofisa sili ma le matagaluega, o le leoina o tuaoi faavaomalo, mata’itū laau ma fualaau faasāina, faapea le aisa ua tetele i totonu o le atunuu, faapea oloa a kamupani Saina ua iai faitioga ua lē tutusa le faatinoga poo le treatment o le auaunaga mo ia kamupani ma kamupani a tagata Samoa.
Na saunoa foi le minisita ia Tuala e faapea e tele kamupani tetele e lē o faamaoni i le totogiina o TIMS poo le Tax Invoice Monitoring System ma ua tele ai oloa e lē o maua uma le tau o tiute, ma oloa ua sao mai i le atunuu e lē tiuteina.
O le aso faamanatu i tausaga uma na maua ai foi le avanoa o le Minisita e faailoa ai o lona ofisa e oo uma atu iai finagalo o le atunuu e pei o talosaga, faaseā ma fautuaga i mataupu eseese.
O le mafuaaga lea na faaalia e Tuala na te maua uma ai le silafia i mea eseese o loo tutupu i le auaunaga a lana matagaluega.
O le masini fā’ata fou ua iai nei le X-ray scanner o se masini na aumai e faaaogā e su’e ai pusaoloa tetele ae lē o se fā’ata na aumai e matamata iai, ae ia faaaogā lelei ma faaaogā i taimi uma.
Faaalia e le minisita e maua lona mafanafana pe a maua i lana faafofoga o loo galue le masini poo le scanner auā e lē pepelo le masini e atamai ma ati lana vaai e aveesea ai le masalosalo i ni oloa faasāina ma oloa e lē talafeagai o loo aumai i se pusaoloa.
O se masini foi e faaitiitia ai tuua’iga faasaga i le matagaluega.
O le sini autū o le aso mo auaunaga tau ofisa o le tiute o lenei tausaga, o le faatāua lea o manulauti tauave i le lelei faatino o galuega, o le mautinoa lea o le manuia ma le malupuipuia o tagata.
