O le aso 30 o le masina nei o Oketopa e amata faagasolo ai le ta’amilosaga lakapi ta’ito’afitu faavaomalo mo le asosi o tagata logonoa i le lalolagi e faia i le atunu’u o Iapani. Ua tapena iai le au masi’i a Samoa mo ē e logonoa ma ua lagolagoina ai e le malo lea tapenaga e ala i se fesoasoani tupe e 50 afe tālā. E to’a sefulufā le ‘au masi’i a le atunu’u mo lea ta’amilosaga faavaomalo ma ua aofia ai ma sui o le pulega o le ‘au e to’afā.

O le ta’amilosaga e amata i le faaiuga o le masina nei ae mae’a i le aso 3 o le masina fou o Novema.  

I se isi o fesoasoani a le malo ua fa’ailoa lautele, o le vaegatupe e 184,400 tālā ua tu’uina atu i tapenaga a le ‘au ta’alo a Samoa mo taaloga olimipeka a tupulaga talavou o le lalolagi.

O le Fa’alapotopotoga o Taaloga ‘ese’ese a Samoa ma le Komiti o Taaloga Olimipeka a le atunu’u, le SASNOC, ua fa’aauala atu iai lea fesoasoani tupe. O ia ta’aloga e amata fa’agasolo i le aso 31 o Oketopa ae mae’a i le aso 13 o Novema ma e 5 taaloga o le a tausiniō ai le ‘au masi’i a le atunu’u.

E lē o fa’ailoaina e le Ofisa Sooupu a le malo poo a ia taaloga o le a tausiniō ai Samoa i taaloga olimipeka a tupulaga talavou. E faia ia taaloga i le aai o Dakar o le laumua o le atunu’u o Senegal i Aferika i Sisifo.

E to’a sefululima le ‘au ta’aalo a Samoa mo ia taaloga e aofia ai ma i latou o le a ta’ita’ia le ‘au masi’i a le atunu’u.

O taaloga mulimuli o le olimipeka mo tupulaga na tausiniō ai se ‘a’u a Samoa o le tausaga e 2018 sa faia i le atunu’u o Argentina ma e to’a sefulufitu le ‘au ta’aalo na masi’i iai.