Ua ave faafautuaga e se tasi o alo o le atunuu sa filifilia i le aulakapi taitoafitu a le Manu Samoa o ia lea o Elijah Niko, se fautuaga malosi i le pulega o le lakapi i Samoa ma le pulega o le tatou autaitoafitu ina ia silasila i nisi o to’a o loo mafua ai ona faaletonu taaloga a alo ma fanau i nisi taimi.
I sana tusitusiga i lana itulau i le api o foliga le facebook, o loo ia faailoa ai lona faaalu o ana seleni e fesoasoani ai i nisi o tama o le ‘au, ma lona totogi lava e ia i ana tupe o lona pasese pe a malaga i se taaloga.
Ua ia faailoa ai foi lona faaalu o ana tupe e faataumamafa ai nisi tama o le tatou autaitoafitu.
O le taofiofi o avanoa o nisi o le ‘au mo konekarate i isi atunuu le isi vaega o loo faailoa e Elijah Niko.
O lona faailoa o ia vaega ua iai ma lona talitonuga e lẽ toe filifilia o ia ona o lona faailoa faalauaitele o ia vaega.
E lē o se taimi muamua lenei ua masua mai ai i fafo ni tuuaiga mai tama lakapi, ona o ni faaletonu i le lotoifale o le taaloga.
