O le Aso Tofi o le vaiaso nei le aso 2 lea o Fepuari o le a faaulu ai suafa o sui faatutū poo sui tauva, mo le faiga filifiliga a le itumalo o Vaimauga 3, e toe saili ai sona sui usufono i le Palemene.

Ua faailoa foi e le ofisa o le komisi o faigapalota o le aso 24 o le masina fou foi o Fepuari o le a faatino ai le palota laititi a lea itumalo faapalota. 

I le pepa o faasalalauga mai le ofisa o le komisi o faigapalota ua faailoa ai, o le aso 2 o le masina fou e faaulu ai sui faatutu ae o le aso 3 o Fepuari le Aso Faraile o le vaiaso nei, e tapunia ai le lesitalaina o sui tauva.

O le aso 9 o Fepuari e faamuta ai le avanoa e toe faaui ai i tua se suafa o se sui tauva, ae o le aso 22 o Fepuari e faatino ai le palota muamua poo le pre polling a o lumanai le aso 24 o le palota laititi.

Ua faailoa foi e le ofisa o le komisi o faigapalota o le Aso Gafua o le vaiaso nei le aso 30 o Ianuari ua amata talia ai talosaga mo tagata palota o lea itumalo mo le faia o latou palota muamua ona o mafuaaga o loo aiaia i le vaega 61 (1) o le Tulafono o Faigapalota o le tausaga 2019.

Ua iai le talitonuga o le a iloa le aofaiga o ni sui tauva ma pati faaupufai o le a tauva ai, pe a tapunia le faauluina atu o suafa o sui faatutū i le faaiuga o lenei vaiaso.