Ua aumai i se tulaga faalauaitele se faasilasilaga mai le Matagaluega o Pisinisi, Alamanuia ma Leipa o loo iai le vaaia o le polokalame o galuega faavaitaimi, ua faailoa ai le taofia le tumau o ia galuega mo le masina lenei o Ianuari, a o faagasolo ai se iloiloga e toe faatulaga ai aiaiga mo galuega faavaitaimi.

O se faasilasilaga na aumai i le faaiuga o le vaiaso na tea nei, a o faia ai sailiiliga i le tuua e nisi o le atunuu i le ogatotonu o Ianuari mo galuega faavaitaimi i Niu Sila.

O loo agai sailiiliga nei i le fia iloa poo ai i latou na faia feuiuiaiga mo le tuua o le atunuu e ia tagata, ae pe sa aafia ai ma le ofisa o loo gafa ma le faia o tapenaga mo le auina atu i fafo o tagata faigaluega faavaitaimi.

Ua faaalia e le matagaluega o alamanuia, pisinisi ma leipa e tatau ona utagia ma usitaia le faaiuga a le Malo ona o nisi o vaega o loo tau faamae’a ona faatulaga, auā le lelei o le polokalame mo le manuia lautele o tagata i Samoa.

O le tasi lenei o mataupu sa faailoa iai atugaluga o nisi o sui faipule i le Palemene ia latou saunoaga faalauaitele i le tala faaopoopo muamua o le tupe.

Ae i se finagalo faalauaitele o le Sui Palemia le afioga Tuala Tevaga Iosefo Ponifasio i le faaiuga o le vaiaso i luga o auala o fesootaiga a le Malo, o loo ia talosaga ai i le atunuu ia lava papale a o tau faamae’a le galuega o loo faatino.

Ua faaalia e le Sui Palemia o loo faaauau pea fesootaiga ma Malo o Niu Sila ma Ausetalia ina ia silafia e ia Malo fuafuaga o le iloiloga o loo faia i le polokalame.