O le faaaliga o measina ma aganuu a le Pasefika o se tasi lenei o faamoemoe tāua e auai faatasi ai atunuu uma o le Pasefika e faalauiloa ai aganuu a atunuu taitasi lea e masani ona autovaa atu ai le ausiva a faiaoga ma nisi o sui auai.

O lenei faaaliga e tai fā tausaga ma faatino ae peitai ona o le pepesi ai o le faamai o le koviti sa le mafai ai ona faataunuuina i le 2020 talu mai le faaaliga mulimuli lea sa faatautaia i Guam i le 2016.

O se fiafiaga lea i le sui mai le Matagaluega o Aoga Taaloga ma Aganuu, Tuaopepe Perenise Tinei i se faatalanoaga ma le Pacific Community i le tāua ai o lenei faaaliga mo Samoa lava ia.

“E maualuga le faaeaea a Samoa i lenei faaaliga ona o le avanoa tāua e mafai ai ona faalauiloa a tatou measina ma a tatou aganuu i le lalolagi.

“Ou te talitonu o le agaga foi lea i isi atunuu o le Pasefika, o se auala foi e mafai ai ona teumalu a tatou aganuu i le Pasefika ma measina e patino lava ia i tatou ma e tulaga ese ai le Pasefika mai isi atunuu o le lalolagi.”

O le tausaga fou i le masina o Iuni lea o le a talimalo ai Hawaii mo le faaaliga lona 13.

“E momoli ai faamanuiaga i le atunuu o Hawaii ia i latou o loo gafa ma tapenaga o lenei faamoemoe i le tausaga fou a o fuafua ai Samoa i ana tapenaga e tuuina atu se sao mo le faaaliga.”

O le tausaga e 1972 na faavaeina ai lenei faaaliga ma sa talimalo ai Samoa i le tausaga 1996.