O loo suesue e le Matagaluega o leoleo le mafuaaga o le maliu o se alii turisi 31 tausaga le matua i se tasi o faletalimalo i Vailima i le taeao o le Aso Gafua o le vaiaso lenei.

O loo tapu ona faailoa le faletalimalo faapea ai ma le atunuu o lē ua maliu ona o tulaga i le puipuiga.

Faamaonia mai e le sui komesina o leoleo, Papalii Monalisa Tia’i Keti, o lea alii na malaga mai i Samoa i le faaiuga o le vaiaso na tea nei, peitai e oo atu le aufaigaluega i le potu o le faletalimalo o loo nofo ai ua maliu.

Faaalia e Papalii, i suesuega muamua o loo atagia ai e lē o iai ni gaioiga faasolitulafono sa faatino.

O loo tālia e leoleo le faaoo ane i le ofisa o pepa faamaonia o le talaaga o lea alii mai le atunuu o loo aumau ai.