O loo faagasolo pea ona faamae’a le toe iloiloina o faiga faavae mo galuega faavaitaimi i Niu Sila ma Ausetalia, ma ua faailoa e le afioga i le Sui Palemia o le autu o le toe iloiloina o ia Faiga Faavae, ina ia mautū lelei manaoga o Samoa i lalo o lenei Polokalame, ma manino aiaiga mo le faafaigaluega ai o a tatou tagata, pe a malaga atu mo galuega faavaitaimi i ia atunuu.
Faaalia e le Sui Palemia e mulia’i ona faataunuu lea o ni faatalanoaga ma paaga i Niu Sila ma Ausetalia, mo ni aiaiga fou, ina ia mausalī le faatinoga o lea polokalame, auāfaamanuiaga mo ia atunuu ae faapea foi ma Samoa.
O loo faaauau pea ona tuua le atunuu e faigamalaga mo ia galuega i lisi faatalitali a le Malo mo masina o Aperila ma Me.
O loo iai foi ni fetuutuunaiga i Niu Sila, i nisi o alo ma fanau, ua lē mafai ona faaauau galuega ona o le afā tele o Kapelielu (Cyclone Gabrielle), sa aafia ai togalaau, sa mafai ona faafaigaluega ai pea i latou, i nisi vaega o galuega i isi Kamupani seia mae’a taimi faatulagaina o a latou konekarate.
Ua toe faailoa mai foi le amata i le masina fou ona tuu atu le filifiliga o i latou, e auai i galuega faavaitaimi i nuu taitasi, e tauala atu i Fono Faavae a Itumalo, latou te filifilia ai a latou tagata, e tatau ona malaga atu mo galuega faavaitaimi i Niu Sila ma Ausetalia e tusa o aiaiga faaletulafono, ae tumau pea le faafoeina o nei malaga i le faamalumaluga a le Malo.
Ua faailoa e le afioga Tuala Tevaga Iosefo Ponifasio o le Sui Palemia ma le Minisita o le matagaluega o tiute ma tupe maua, le taunuu i se tulaga lelei o le faafouina o laisene pisinisi, talu ona faamamalu le Tulafono Fou o Laisene Pisinisi ia Tesema 2022.
Ua toe faaleleia atili ai faamaumauga a le Matagaluega i faamatalaga o pisinisi taitoatasi, e uiga ia i latou moni e ana pisinisi, ma i latou o loo iai lafoga tuua, ma i latou tonu e tatau ona totogi a latou lafoga i le Malo.
Faaalia e Tuala o nisi e ana pisinisi e iai faleoloa, o loo talosaga atu foi mo laisene e faatau ai le ‘ava malosi ma ua faigofie ai foi le galuega a le Pulega o le ‘Ava Malosi ia latou iloiloga i talosaga, ona ua mautū faamaumauga o ia pisinisi i le Matagaluega o Lafoga ia i latou tonu lava e ana pisinisi.
O le agaga o le Malo, ia faatupula’ia pea le atina’e o pisinisi i Samoa auā manaoga faatauvā i le va o lea pisinisi ma lea pisinisi, e maua ai le pa’ū i tau o oloa mo tatou tagata, ae ia tausisia ai pea le faamaoni i le lesitalaina o i latou tonu e ana pisinisi nei.
Ua talosagaina ai e le Sui Palemia le mamalu o le aufaipisinisi ma Samoa atoa, afai o iai ni a latou paaga e le o ni tagatanuu moni o Samoa aemaise pe a leai ni pemita e galulue ai i Samoa ma faatino pisinisi o loo latou galulue faatasi ai, e tāua le faailoa atu i le Matagaluega, ne’i aafia le pisinisi, aafia ai ma o tatou tagata e tusa o ala o le Tulafono.
O loo ave lava le faamuamua a le Malo i pisinisi a o tatou tagata, ona o le puipuiga o le tamaoaiga o Samoa ma ona tagata, faapea ona eleele auā le lumanai.
