Ua faagasolo i le Aso Faraile o lenei vaiaso le faigā filifiliga e ala i le palota laititi, le toe sa’ilia o ni sui usufono i le tofi faipule o le Palemene itumalo faapalota o Safata 1 ma Vaisigano 2.
O loo tauva mo le itumalo o Safata 1 sui faatutū e to’alima e aofia ai tama’ita’i e to’alua, ae o Vaisigano 2 e to’alua sui o loo tauva mai ai.
E toafā sui tauva o le vaega faaupufai o le Faatuatua i le Atua Samoa ua Tasi o loo aofia i le filifiliga a Safata 1 ae tasi le sui tauva o loo lagolago i le vaega faaupufai e puipuia aiā tatau a tagata.
O Vaisigano 2 e ta’itasi sui tauva o le Faatuatua i le Atua Samoa ua Tasi ma le pati e puipuia aia tatau a tagata o loo tausino mai ai.
Ua iai le faamoemoe o le 3 i le aoauli o le Aso Faraile e tapunia ai falepalota ona faailoa ai lea o le taunuuga o palota laiti e lua i sui o le a manumālō i le faitauga muamua e lē aloa’ia poo le preliminary results.
O le Aso Toona’i e tatau ona faia ai le faitauga aloa’ia ma faamautū ai sui o le a manumālō mo tofi faipule o Vaisigano 2 ma Safata 1 mo le saofa’iga a sui usufono o le Paea’iga 18 a le Palemene.
Afai e manuia mai se sui tauva tama’ita’i i ia palota laiti ona toe atoa lea o le to’alima o faipule tama’ita’i i le Palemene, ma faato’ā faaaogā ai loa aiaiga o le faavae mo le faaopoopo mai o se isi tama’ita’i sa tauvā i le faigāpalota tele e atoa iai le to’aono o faipule tama’ita’i o le Palemene .
Ae afai e manumālō se alii mai Safata 1 lea o loo tauva ai ma tama’ita’i, lona uiga e to’alua nisi tama’ita’i sa tauva i le faigāpalota tele e tatau ona aumai i totonu e faaatoa iai le to’aono o faipule tama’ita’i e tusa ai ma le faauigaina o le 10% lea na aumai ai le faai’uga a le Faamasinoga i le 2021.
