Ua finagalo lava le Asosi o tagata taaalo lakapi a Niu Sila le NZ Rugby Players Association ina ia faaauau pea a latou fuafuaga mo le faatūina o se isi totino fou latou te faaauauina le taaloga faapolofesa.

E pei ona faailoa atu muamua i talafou se fuafuaga e toe fetuunai le pulega o le taaloga ae lē o finagalo autasi uma iai i latou e faia le faaiuga lea na fono i le aso ananafi i Ueligitone.

O le fuafuaga ia filifilia tutoatasi sui o le fono faatonu poo le Board a le lakapi, e lagolago iai le Asosi lea o le autaaalo lakapi ma le NZ Maori Rugby Board ae na toatele na tetee iai ina ua faatino le palota.

O le fuafuaga lona lua lea ua pasia e tatau ona iai ni sui se toatolu o le Board o ni tagata sa umia tofiga ma iai le tomai i fono faatonu a iuni faaitumalo.

Lea la ua gaioi le Asosi a le autaaao lakapi i le isi laasaga e pei ona o latou faaata talu ai ma ua faatulaga ai foi la ma se laina ua va ai le taaloga faapolofesa ma le lakapi a le komiuniti.

Fai mai Rob Nichol o le pule o le Asosi lea NZRPA, e manaomia le malamalama ma taulai i le taaloga faapolofesa ma o le a tumau pea foi ona faakonekarate ma le NZ Rugby ina ia unaia le lakapi faapolofesa.

O nisi alii iloga i le taaloga o loo saini i le tusi a le asosi a le autaaalo e aofia ai David Kirk ma Richie McCaw sa kapeteni uma i le All Blacks.

Puna o Faamatalaga: https://www.rnz.co.nz/news/sport/518324/new-zealand-rugby-players-association-to-forge-ahead-with-separate-body