Ua ioeina e alii e toalua o Trevor Aloese Pitoitua ma Sam Victor o le silia i le toasefulu na molia e leoleo mai la latou osofaiga i Malifa, moliaga o le umiaina o se laau malosi e lei laiseneina, umia o mariuana, ma le umiaina o fualaau faasāina o le aisa e tusa lona mamafa ma le 0.04kalama.
O le isi vaega e aofia ai Michael ma Venus Etevise Imeleta Chang Wong, o Tasi Divine Chang Wong, o Meripa Choo Koon ma Antonia Tuala, o Michael Viliamu, o Michael Vito, o Lagani Pelenatino poo Ikenasio, o Fuivai Pinati Patelesio, ma Lewis Brown o loo teena moliaga.
O le tamaitai o Lesina Faualo e lei tulai i le Faamasinoga ma ua tuuina atu iai le tusisaisai.
O loo taofia pea i Tanumalala le isi toalima e lei tatalaina i tua, e iai Michael Viliamu, o Michael Vito, o Lagani, o Fuivai ma Lewis ma ua poloaia e le alii faamasino ia Fepuleai Ameperosa Roma ia tapena mai ni a latou talosaga tusitusia i luma o le faamasinoga a o lei oo i le aso 26 o le masina nei e toe valaau ai a latou mataupu, pe afai e mananao e tatala i latou i tua.
O le ulugalii o Michael ma Venus Etevise Imeleta Chang Wong ma le la tama o Tasi Divine Chan Wong o loo tulai ai le alii loia o Faimalomatumua Mathew Lemisio, ae o Lesina Faualo o loo tulai ai le alii loia o Tuisa Tasi Patea.
O loo tatala i tua tamaitai e toalua o Meripa Choo Koon ma Antonia Tuala, ma o le masina o Aokuso ua faatulaga e faia ai faamasinoga o i latou o loo tetee, ae o le aso 14 o Mati o le a lauina ai le faasalaga mo i latou na ioeina moliaga.
