O le aoauli o le asō lea na faatautaia ai le faafotutupu a le suafa Faamausili i le Afioga i le Sui Palemia, Tuala Tevaga Iosefo Ponifasio i Niuula i le afioaga o Malie.

O lenei sauniga na molimauina e aiga aemaise o tamalii ma le afioaga.

O le susuga i le Tiakono a le Ekalesia Katoliko i Malie na taitaiina le faapaiaina o le nofo ma na ia faasoa ai e tusa o le tofiga.

“E tāua le taitaiga a le tagata ma le mea o loo taoto ai le finagalo o le Atua, e talitonu foi o le a iai lape o le taitaiga.

“O nisi taimi tatou te manatu ai o le filifiliga o i tatou i ni tofiga maualuga o se auala ma se avanoa tāua tatou te saofafai ai e pei tatou o ni tupu ae auauna mai tagata ia i tatou.

“Ou te talitonu a maopoopo le tulaga i le tausiga o le aiga o le a faapena foi ona mapo le ituvai o le talalelei.

“Lau Afioga i le Matua, avea Afioga a le Atua e taialaina ai lou valaauina.

“O oe o le auauna, o a’u o le auauna, a tatou taliaina lo tatou tofi o tatou o auauna, e mautinoa e manuia o tatou faiva.”

Na saunoa se tasi o matai o le aiga, Auimatagi David Faaitua Milford, o le lona tolu ai lea o nofoaiga i le suafa.

“Na feiloai le aiga i le Aso Toonai na mavae atu nei a o loma le faamoemoe ma o lea ua faataunuu le nofo a le Sa’o a le matou aiga iinei i Niuula i Malie.

“O le tino a le matou aiga e toaono faletama ae o le faaiuga foi ua uma ona malele iai le Susuga i le Malietoa Tanumafili ua lagomau mai tiasa, o le alafua lava na faataatia e ia lea e mulimuli ai lava lenei aiga.

“Na muamua i le tina matua ia Ela Esau ae peitai ua maliu le nofo a le itu lea i le tausaga na mavae atu nei, ia o lea na saili ai se gafa o le fale o le tina ia Lua, o le matou tina e lona lua i le fanau o lea la ua iai le faamoemoe i le asō.

“O lea la ua uma le filiga a le aiga ma ua tasi moemoe o le Afioga i le Sa’o Alii ia Tuala.”

Sa fesiligia i le tulaga o le filifiliina ai o le Afioga i le Faamausili ma na ta’ua e Auimatagi e lei faafaigata lea tulaga.

“O lo matou aiga o se aiga fealofani i le matou a la tino e lei faigata.

“O le tulai mai o le Sa’o Alii, o lana faaeaea ma lona saili malo ua faaeaina ai o matou aiga.

“Ou te masalo e na o se aiga e lē lava le mafutaga o le a lē avea iai se faamuamua.

“O suli ma feoi o lenei aiga i Malie o loo malamalama i le alafua na faataatia mai e le Susuga i le Malietoa Tanumafili, ma o lea lava e usitaia le malelega.

“O lea matou te iloa o lea e soifua Malietoa Moli, se’i vagana la ua sui se isi auala e taitaia ai lo matou aiga, ae o le taimi nei o lea lava e faaaloalo i le malelega a si tuaa o Malietoa Moli lea e taitaia aiga nei i Niuula.”