I le aso lona tolu o faafiafiaga, tauvaga tautalaga, pese ma siva i malae eseese (stages) e lima e aofia ai Samoa, Le Atu Kuki, Niue, Tonga ma le Diversity Stage o loo iai atunuu e pei o Saina, Fiti, Initia, Korea, Sri Lanka ma Tokelau. 

O le Diversity Stage lea foi ua iai le avanoa o le a faafiafia ai ma le aufaafiafia Apoliki mai Ausetalia. 

O le a faafiafia lea ausiva i le aouli nei i le 1:30pm a o faia le malologa ma a o tapena ai mo tufatufaga faailoga poo le laugatogi i le 3:30pm. 

I se pepa o faamatalaga na faailoa ai o le toatele o fanau aoga i Aukilani, o le taimi muamua lenei ua mafai ona auai ai i faafiafiaga o le Polyfest. 

O le taimi muamua foi ua mafai ona toe auai ai tagata matamata talu mai le tele o faafitauli na feagai ai ma le atunuu i le 2019. 

I le tausaga 2019 na taofia ai i lona aso mulimuli o le Polyfest ona o le faalavelave na tulai mai i Kalaiesetete, o le tausaga e 2020 na faafuasei ona taofia ona o aafiaga o le Koviti-19 ma le tausaga na tea nei na faatino ae faasā le aumatamata i le malae ona o popolega lava i le pepesi ai o le Koviti. 

Mo le malae a Samoa ua mae’a a latou tauvaga tautalaga ma ua faagasolo siva ma pesepesega a fanau aoga. O le Aso Toonai e faamae’a ai lenei polokalame tāua o le Polyfest