O le aso 5 lenei o Oketopa i tausaga uma e faamanatu ai e Samoa ma le lalolagi le taua o le galuega ma le tautua a Faiaoga le International Teachers Day. O lo latou sao i le aoaoina o fanau e le fesiligia lona taua, ae o se galuega e le faigofie ona e tele foi ona luitau.
O le luitau sili o feagai nei ma le Malo e ala i le Matagaluega o Aoga Taaloga ma Aganuu, o le toagaogao o faiaoga, ma o le isi lea o manulauti a le Malo mai tausaga e tele ua tuanai, o le faatosina o tama ma teine ua ulufale i Iunivesite e ave le tomai faafaiaoga.
O le tasi o mafuaaga o le faamaamulu o nisi faiaoga ma suia a latou galuega o totogi ma o se isi lea o luitau i soo se faigamalo.
Ae i le toe taliu mai i fanua o le taitai o le Malo le afioga i le tamaitai Palemia, ua ave ai lana faafetai ma le faamalo e ala i sana saunoaga faalauaitele i le sao tāua o faiaoga i Samoa.
Se vaega o le saunoaga faamanuia a le tamaitai Palemia le afioga Fiame Naomi Mataafa, i le aso faavaomalo o faiaoga o le lalolagi, e pei ona faamanatu i Samoa.
