O le amataga o lenei masina o Fepuari na faato’a nofoia ai e le susuga Papalii John Taimalelagi Afele le nofoa o le tofiga Ofisa Sili o pulega ma le Lesitala o Faamasinoga a Samoa, ma faafeiloai ai e le tamaitai minisita ma le minisita lagolago faapea le aufaigaluega i ona tulaga tofi eseese, aemaise le vasega i afioga i alii ma tamaitai faamasino, e le gata o le faamasinoga maualuga i le sui faamasino sili le afioga Niava Mata Keli Tuatagaloa ma faamasino o lea faamasinoga, ma e faapea foi i faamasino o le faamasinoga faaitumalo.
Sa auai foi le afioga i le Peresetene o Faamasinoga o Fanua ma Suafa ma afioga i alii ma tamaitai faamasino o lea faamasinoga tāua a le atunuu.
O le sauniga lotu na tomua ai le faafeiloaiga o le ofisa sili filifilia, sosoo ai ma le ‘ava faatali sa sufi ai paia ma mamalu faalupe o le nofo a too i vaega eseese o le matagaluega, faapea tumutumu o paia faaleaganuu o Samoa.
O saunoaga a le afioga i le Minisita, Matamua Vasati Pulufana, ma le Ofisa Sili o le matagaluega ua toe foi e tauave le pulea o le matagaluega na taualuga iai le polokalame.
Ni vaega o saunoaga mai le tamaitai Minisita o le matagaluega o faamasinoga ma le faafouina o mataupu tau faamasinoga afioga Matamua Vasati Pulufana, ma le saunoaga a le Ofisa Sili filifilia susuga Papalii John Taimalelagi Afele.
