O le faatomuaga lea o le tofiga fou a le Afioga i le Minisita ia Mulipola Anarosa Ale-Molioo i lona seei mai ai i le tofiga fou e tauaveina le Matagaluega o Tina ma Tamaitai Atinae o Afioaga ma Agafesootai ina ua mae’a ai le fetuunaiga o tofiga o Minisita o le Kapeneta i le masina ua mavae.
Na amatalia lenei faamoemoe i se sauniga lotu ma sosoo ai ma le ‘ava e faafeiloai ai le Minisita.
O le folau faatasi o le faamamafa lea a le Afioga ia Mulipola i lana saunoaga.
“E lē fou la outou silasila ia te au, atonu o lea lava sa ou mafuta mai i le tatou komiti ma sa ma galulue soosootau’au ma le afioga i le Minisita ua outou faamavae atu iai le Afioga ia Lamositele.
“Ae talitonu o lea ua ou sau i le aso lenei e osi la tatou feagaiga ua tele se galuega ua mae’a faataatia e le Minisita ia Leota.”
Na momoli ai foi le faamalo a le Minisita i le Pule Sili o le Matagaluega ua faamavae ma le tofiga Afioga Dr. Mema Motusaga i lana tautua.
“I tua atu o le Minisita sa saofai mai le Ofisa Sili, e momoli le faafetai ua mavae e leai se faiva e asa ma se ma’umau e lē atoatoa i le auaunaga.
“E iai lo’u talitonuga a faapea o le tatou sa o le sa folau e alo faatasi o lona uiga o tua atu o le Minisita ma lona lagolago ma le Matagaluega e tua atu i le fautuaga aupito sili ona lelei ma talafeagai e tuuina mai e le tatou Pulega o iina e fau ai le sa aemaise ai o le fesootai atu o le Matagaluega i luma o le laulau a le Kapeneta.
“O lona uiga e leai ma se isi o le tatou Matagaluega e leai sona sao i le aloina o le tatou sa lea ua amata atu i le aso lenei.”
Ae o le vaaiga taulai o le tulimataia lea o le soifua manuia o Samoa e ala i auaunaga a le Matagaluega o loo tuuina atu i le atunuu.
“O le tatou folauga tatou te taunuu ai i la tatou vaaiga taulai ae manatua e iai le taimi e sousou ai le vasa, e iai le taimi e luitauina ai lou faamaoni, o lau fesootaiga i le aiga, o lou soifua faaleagaga o taimi pito sili ia na tāua.
“E lē tāua le taunuuga ae tāua pe faafefea ona e tali atu i luitau o le tatou savaliga, aua a sousou le vasa e uma tatou atamai ma le malosi ae o tatou o tagata faatuatua ma Kerisiano e iai le isi malosiaga tatou te tua iai.”
Na faasoa Mulipola i vaega e ao ina toe faamanatu ai i le aufaigaluega i ona tiute ma matafaioi ua tofia ai.
“O soo se tagata faigaluega o loo lima taitaiina i tulafono ma taiala ma faiga faavae e mafai ai ona lima taitaiina ai lana galuega e pei foi o lo’u Minisita e tusa ai o nafa ua tofia ai.
“Ae o le laualuga o lenei auaunaga ia galulue faatasi o le Matagaluega lenei e atoa ai Samoa auā foi pau lea o le Matagaluega o loo matilatila ai le toe fafagu ma toe faatino ai tu ma le aganuu a le tagata Samoa.”
O le Afioga i le Minisita na tofia muamua e na te tauaveina tiute i le Matagaluega o Tupe ma sa tele foi lona sao i lenei Matagaluega e tusa ai o ana fuafuaga ma auaunaga auā le faasoasoaina lea o le tamaoaiga o le atunuu e ala i ana atinae.
