O le Afioga ia Gatoloai Tilianamua Afamasaga o loo auai atu i le fonotaga ua faaigoaina o le Fono i Niu Sila faatasi ai ma Komesina o Ofisa o Komisi o Galuega a Malo o le Pasefika lea o loo faagasolo i Ueligitone.

I faasalalauga i upega tafailagi a le Kovana o Niu Sila, na faia ai se faatasiga a le Afioga i le Kovana ia Dame Cindy ma lona alii ia Richard Davies faatasi ai ma Komesina o le Pasefika ao auai ai fonotaga.

Sa faailoa ai le agaga fiafia o le Kovana e talimalo mo sui mai le Pasefika e ala i le auai ai i le fonotaga o lenei tausaga.

“Ou te talitonu o lenei fale o loo fausia ai aganuu eseese, o talaaga, o tamaoaiga ma faasinomaga o tagata Pasefika ma o loo avea ma faamalosiau mo i tatou e ala la tatou tautua mo se manuia o o tatou tagatanuu.

“O se fiafiaga foi e talimalo ai mo outou o loo tautuaina Malo i le Pasefika e ala i le taimua i le taitaiina lea o auaunaga a Malo taitasi ma ana atinae.

“O Niu Sila ua avea ma faasinomaga ma aiga i le silia ai ma le 300,000 o tagata mai le Pasefika e aofia ai ma o outou aiga o loo ua avea ma tagatanuu e le gata i o outou atunuu a o Niu Sila nei.”

Na ta’ua e le Kovana i se tasi o ana asiasiga i Samoa ma le Atu Kuki, na ia molimauina ai faafitauli o loo feagai nei ma atunuu o le Pasefika i suiga o le tau.

“O aafiaga i le siisii ai o le suasami ma le tulaga o le ola maloloina o figota o le gataifale ma o loo o’u iloa o nei faafitauli o loo folasia lea i soo se fonotaga faavaomalo, fonotaga i le Pasefika e pei o le poloketi o le Blue Pacific poo poloketi foi o loo faatinoina.

“O nei faafitauli e faaopoopo lea i le siitia ai o auaunaga a le Malo ina ia mafai ona fautuaina ai Malo taitasi ma ia lagolagoina faiga faavae ma galuega faatinoina.”

O lenei vaiaso o loo faagasolo ai lenei fonotaga na faailo ai e le Kovana e avea lea ma lagolago i manatu o le a faasoa ai sui usufono a o tapena ai mo le fonotaga a Malo o le Taupulega i Samoa i le tausaga fou.