O se tala fiafia lenei mo tagata Samoa uma o loo aumau i atunuu mamao, ona o lea ua tatala le isi auaunaga fou e faafaigofie ai le lafoina o a latou seleni i aiga o loo faamauli mai Samoa.
O le Aso Lulu, aso 7 Iuni 2023 lea na faalauiloa aloaia ai le faiga paaga lea a le KlickEx Pacific ma le SPBD ina ia galulue faatasi e faatino lea auaunaga mo le lafoina o tupe a tagata Samoa o loo aumau i Niu Sila ma Ausetalia, mo latou aiga i Samoa.
O le faiga paaga lenei a le SPBD Microfinance ma le KlickEx Pacific, e matuā faamoemoeina mo le saogalemu ma le manino o le lafoina atu o tupe i Samoa, aemaise foi i le taimi o le a agai ane ai i latou i Samoa e tala atu i tua a latou seleni mai aiga i nuu mamao.
O le aso 1 o Iulai lea ua faatulaga o le a amata faatino ai loa lenei tautua, ma e faaaoga ai lava auala vavave o fesootaiga i luga o upega tafailagi, le spbd.klickexpacific.com.
O le SPBD e agai le tele o ana auaunaga mo le saunia o ni avanoa e maua ai seleni mo nai tina e itiiti le tupe maua a o latou aiga, ae o le fesoasoani tau seleni mai le SPBD o se auala ua mafai ai ona faia ni faaleleiga mata’ina i o latou olaga ma aiga.
O fesoasoani e pei o le faatupeina o le toe faaleleia o maota o aiga ma fesoasoani foi i aoaoga mo fanau i aoga amata, ma le faaaupegaina i le itu tau seleni o ona sui auai ina ia see ese mai le olaga mativa ma le lē tagolima sa iai, ae ia mafai ona amata ni tamai pisinisi ma faapea ai lava ona faatupulaia le tamaoaiga.
O le isi foi la lenei fesoasoani fou o le auaunaga a le SPBD i le la faiga paaga ma le KlickEx ina ia mafai ona latou lafoina tupe a tagata mai Niu Sila ma Ausetalia mo o latou aiga i Samoa.
Saunoa le CEO o le KlickEx, le susuga Ben Kealy, ‘ua latou fiafia ina ua maua le avanoa e galulue faapaaga ai ma le SPBD mo le saunia o nisi auala fou mo tagata Samoa ina ia lelei ma tautofie foi le auala e lafo ai tupe mo nai aiga i Samoa. ‘
Ta’ua e Kealy, ‘e fiafia i le galuega o loo faatino e le SPBD i Samoa, ma e iai lo latou talitonuga, o le agai atu o latou ma lenei auala mo le lafoina o seleni i Samoa, o le a atili ai ona fesoasoani i lea auaunaga a le SPBD e atili mautu ai a latou galuega fesoasoani i totonu o Samoa faapea foi ma nisi maketi o loo latou galulue ai.’
I le aso na tatala aloaia ai lenei auaunaga, na saunoa ai le Peresitene ma o ia foi na Faavaeina le SPBD Microfinance Network, le susuga Greg Casagrande, ‘O se fiafiaga mo ia le iai i se tulaga o loo taulamua ai i le faia o se suiga lelei mo le tulaga tau seleni mo le Pasefika.
‘O le faanaunauga lea i le SPBD ina ia lelei le tulaga tau tupe i totonu o tagata Pasefika, o le itu lea e latou te naunau ai ia faamautinoa o loo taugofie ma faigofie le lafoina mai o seleni a tagata Pasefika i o latou aiga.’
E lua lala o le SPBD i Samoa, e tasi i Salelologa ma le tasi i le nofoaga o le SNPF Plaza i Savalalo, o iina o le a saunia ai e le SPBD ma le KlickEx vaega e mafai ona agai atu i ai le atunuu i Samoa mo le talaina i tua o a latou seleni o le a lafo atu i atunuu mamao.
I le faaiuga o lea sauniga na faaiu ai upu a Casagrande e faapea, “O lenei tatalaga aloaia o le taunuuga lea o se galuega faifaatasi sa pulupululima faatasi i ai tagata uma mai nai masina ua tuanai atu, ma e ui e lē o mafai ona ou momoli la’u faafetai ia i latou taitoatasi sa galulue fita ina ia tino mai lenei faamolemole, ae momoli la’u faafetai i vaega a le SPBD ma le KlickEx, faafetai tele lava mo la outou lagolagosua aemaise foi le fesoasoani tele mai le Faletupe Tutotonu o Samoa.”
