O le afea o Samoa i lenei vaiaso e le Taitaifono o le Pulega o le Lakapi a le Lalolagi ia Sir Bill Beaumont ma nisi o sui sinia e toalua o le pulega o le taaloga, ua faatino ai i le ogatotonu o lenei vaiaso se faaaloalo maualuga a le taitaifono o le pulega o le Lakapi Samoa i le faaeeina o se suafa matai i le taitaifono o le lakapi a le lalolagi.
O le itumalo o Lepa o loo avea ai le taitaifono le susuga Tuilaepa L Sailele Malielegaoi ma o latou faipule i le Palemene, o loo faatino ai lea faaaloalo.
Faaalia e le taitaifono o le Lakapi Samoa, e iai nisi o mea lelei o le a fanau mai mo le siitia pea o le taaloga lakapi i le atunuu i le asiasi mai o le taitaifono o le lakapi a le lalolagi.
O le Aso Gafua na taunuu ai Sir Bill Beaumont ma lana aumalaga ona o se valaaulia a le taitaifono ma le pulega o le Lakapi Samoa. O le afiafi o le Aso Lua i le faletalimalo o le Tanoa Tusitala hotel na fai ai le tali faaaloalo e faafeiloai ai le aumalaga.
Na faafetaia ai e le taitaifono o le pulega o le lakapi i le lalolagi le valaau faaaloalo atu e asiasi mai, i le faamoemoe e silasila i nisi o galuega ua faatino e le pulega o le lakapi i lo tatou atunuu e tauala mai i fesoasoani a le pulega o le lakapi aoao i le lalolagi. E faatoa iloa le suafa matai e faaee ia Sir Bill Beaumont pe a faatino le saofai.
