Ua faailoa e le Sui Palemia o le sui Minisita o Tupe ona o loo toesea i fonotaga i fafo le tamaitai Minisita o Tupe, tau fou o oloa o le suauu ma penisini, mo le masina fou lenei o Oketopa, ma ua faaauau ai pea ona pa’ū tau o ia oloa manaomia talu mai le masina na tea nei o Setema.
Ua faailoa e le Sui Palemia ua fesoasoani le faaitiitia o le tau o ia oloa, i le faaitiitia o le tau o fela’uaiga poo le freight faapea le tau o le fefaataua’iga o le tala Samoa i le tala Amerika. O loo faaauau pea le tulaga le mautonu o tau o lenei oloa i maketi mo suauu lē faamamāina ma suauu ua mae’a ona faamamā.
O tau fou ua iai nei oloa mo Samoa o le penisini ua 3 tala 51 sene i le lita, suauu kiso ua 3 tala 99 sene i le lita ma le kalasini ua 3 tala 58 sene i le lita. O masina o Iuni, Iulai ma Aokuso ua faamauina o masina ia sa sili ona alu ai i luga le tau o ia oloa i lo tatou atunuu.
O Niu Sila o loo pito maualuga ai le tau o suauu ma penisini e tusa o le kalafi mai le Matagaluega o Tupe o loo faatusatusa ai tau o nei oloa ia Samoa.
Peitai a faatusa i tau i Ausetalia ma Fiti o loo maualalo tesi tau o suauu ma penisini i ia atunuu e faatusa i tau fou ua amata faamamaluina i Samoa mo le masina lenei o Oketopa.
