O le masina o Aokuso o le tausaga nei o le a valaau ai molimau a leoleo e lagolago ai moliaga o le fasioti tagata faamoemoeina, ma isi moliaga e pei o le umia o se aupega matautia o se fana laititi e le faatagaina faaletulafono, o le faaoo manu’a tuga, ma le moliaga o le fasioti tagata paivalea o loo tuuaia ai Edward Fanueli ona o le maliu o le tamaitai sa avea ma leoleo o Mele Lapana ia Tesema o le tausaga na tea nei.

Ua faatulaga e le faamasinoga le taimi e suesue ai lea mataupu, ma ua faaauau ai pea ona nofo taofia i le vaaiga a leoleo lē ua molia, ina ua le manuia lana talosaga e ala i lana loia, e tatala i tua i ni aiaiga e faatali ai le aso o lona faamasinoga.

Sa tetee malosi loia a leoleo e le tatau ona talia le talosaga ona e maualuga le tulaga lamatia o le saogalemu o Edward Fanueli pe a tatala i tua ona o le ogaoga o le solitulafono o loo tuuaia ai, i le ma le isi mafuaaga, e telē le avanoa e mafai ai ona ia fesootai atu i molimau a leoleo.

O le teena o le talosaga ua talia ai e le faamasinoga mau a leoleo ua faavae ai le finauga e le tatau ona tatala i tua lē ua molia.

Ua tapu e le faamasinoga ona faasalalau isi faamatalaga o suesuega o le talosaga, ona o nisi o mau autu a leoleo o le a folasia pe a suesueina moliaga uma i luma o se laulau o faatonu.

Na amata nofo taofia Edward Fanueli ia Tesema o le 2022 ina ua tulai mai le faalavelave na fano ai le soifua o le tamaitai ua maliu.