Ua faaauau pea ona faatino e foma’i o le atunuu o Fiti taotoga faapitoa e saili ai mafuaaga o maliu, mo suesuega a leoleo i ni masalomiaga o ni gaioiga solitulafono e fesootai i le fano o le soifua o se tagata i Samoa.
O le masina fou e taunuu ai se fomai e faia taotoga faapitoa mai le auaunaga a le Matagaluega o leoleo a lea atunuu, mo le faia o ni taotoga mo ni tino maliu se fā o loo iai pea i le maota gasegase i Motootua.
Ua faailoa e le sui Komesina o leoleo susuga Papalii Monalisa Tia’i Keti, o le faaauau pea o le sootaga lenei ma le matagaluega o leoleo i Fiti, ua fesoasoani tele i le vave faia o taotoga ma sologa lelei ai le tapenaina o suesuega a leoleo mo le tuuina atu o se mataupu i le faamasinoga.
O le tasi itu taua o lea faiga paaga ua mafai ona tulai ai i le faamasinoga se fomai faapitoa e faia lana molimau e faamautu ai le taunuuga o se taotoga e iloa ai le mafuaaga o le maliu.
O Fomai Saina sa faia nisi o taotoga e lei mafai ona faia ni a latou molimau i le faamasinoga.
