Ua tu lata mai le masina o Iuni e muta ai le tausaga faaletupe o loo faagasolo ma atoa ai i le faaiuga o Iuni 2023, le 12 masina talu ona faamatuu seleni o le uluai vaegatupe tasi le miliona i komiti a fono faavae a itumalo e 51 ua faamalieina, a latou lipoti ma ua mae’a sueina foi tusi i le faaaogaina o vaega tupe ua faamatuu iai.

O le Aso Lua o lenei vaiaso e valu itumalo ua faamatuu iai le tai $425 afe muamua, ina ua faamalieina le Komiti o le poloketi tasi le miliona i atina’e ua faailoa atu o le a faasoa iai lea vaegatupe tele.

O itumalo ia e aofia ai Lotofaga, Aiga-i le-Tai, Vaimauga 1, Faasaleleaga 2, Safata 1, ma Sagaga 1, Alataua i Sisifo ma Faleata 3.

O itumalo uma nei o loo totoe le isi a latou tai $425 afe tala e atoa ai le tasi le miliona, peitai e faatoa mamulu iai pe a faamalieina a latou lipoti o le faaaogaina o le 425 afe muamua ua faamatuu iai.

E faatoa tuuina foi iai le vaega tupe mulimuli o loo totoe pe a faamalieina lipoti o le sueina o tusi i le faaaogaina o seleni.

I le vaegatupe o le 150 afe mo le faatotogaina o ofisa, o alauni o sui o komiti ma totogi o tagata faigaluega mo le faia o galuega a komiti a fono faavae, e fā isi itumalo o le a sainia maliega ma o lea faatoa faamatuu iai lea vaegatupe.

O itumalo ia e aofia ai Alataua i Sisifo, Sagaga 1, Aiga-i le-Tai ma Faleata 3.

O le faamatuuina o lea vaegatupe ona ua faamalieina lipoti ma lipoti o le sueina o tusi i le faaaogaina o le 2 selau afe tala muamua na faamatuu mo le fausia o ofisa tutotonu o fono faavae a ia itumalo faapalota.