Sa taofia le ave o gasegase mai Samoa ina ua faamalosia le iai o Samoa i lalo o Poloaiga o faalavelave faafuasei peitai e iai lava gasegase na ave e togafiti i fafo e aunoa ma le faalauiloa faalauaitele mai e le faigamalo sei mavae atu nei.
Ua faailoa e le tamaitai Palemia Fiame Naomi Mataafa i lana feiloaiga na tusitala i le vaiaso ne isa na’o gasegase a nisi na mautofi o le malo i lea taimi na tatala pea iai le polokalame o le ave o gasegase i atunuu i fafo. Na iai loa lea o le fesili ina ua see atu le faigamalo fou poo ai e toso a’o ai e afisi.
O le fiafia o le tamaitai Palemia ua toe faaauau lenei polokalame taua e tali atu ai i nisi o manaoga a le atunuu aemaise manaoga i le tautua a le Matagaluega o le Soifua Maloloina e pei o le masini faata le CD Scan ua tulai mai ai ni faaletonu.
Taua e Fiame “O le matou fesili lena na ave i le Matagaluega poo anafea na toe amata na tatala ai ae poo a aiaiga ia na fai a’i, aua o le mea moni a o le tele o ma’i ia sa maitauina muamua o e mautofi i le malo, e sao ai le upu foi lea o ai le tama e afisi ao ai e toso. Ae atonu o lea na aumai le tali ua toe foi a i tulaga masani, e iai a le komiti e aiaia gasegase e ave i fafo”.
O loo galulue nei le malo a Samoa ma Niu Sila e ala i talosaga e tauala atu i le komiti o faalavelave faafuasei le NEOC i tulaga o le faanofoesea o gasegase e malaga atu i lea atunuu. Taua e Fiame o loo iai lava vaega poo provisions i ma’i ua gasegase tele e tatau lava ona ave i le falemai e tali atu ai i mataupu o ma’i tigaiga.
