Ua lē mafai ona lipotia taualumaga o soalaupulega a loia, o le faamasino ma sui faipule e toatolu ua faamavae ma le vaega e puipuia aiātatau a tagata, ona e tapu e tusa o aiaiga o tulafono o galuega a le faamasinoga e faasino i ni mataupu e soalaupule i le koneferenisi tau faamasinoga poo le Judiciary Settlement Conference.
O le Aso Faraile na tea nei na faagasolo ai lea taualumaga, sa faia i le potu o le faamasino o loo faatautaia lea mataupu.
O lea taualumaga o le a faaauau i le Aso Tofi o le vaiaso nei ma iloa ai, le faaauau ona tagofia o le mataupu i lona aoaotetele, pe o le a maua se isi tali i le aso mulimuli o le soalaupulega.
Ua valu masina talu ona faamavae le tofa Tuu’u Anasii Leota, le tofa Mau’u Siaosi Puepuemasi ma le tofa Ale Vena Ale, mai le vaega faaupufai e puipuia aiātatau a tagata.
O aiaiga o iai nei o le tulafono o faigapalota ma le faavae e faamavae loa se sui faipule mai se pati faaupufai sa ia lagolagoina ona ua lagolago i isi vaega faaupufai, e otometi le faagafua loa o le nofoa o lena itumalo ae foi e toe fai le palota laititi.
Peitai e le o fia lagolago ia sui faipule i se isi pati faaupufai ae o loo fia avea ma faipule tutoatasi.
O le mafuaaga lea o le faia o moliaga o sui faipule e le Fofoga Fetalai ae ave le talosaga i le faamasinoga e faia ai se iloiloga ma aumai se faaiuga.
