O le afiafi o le Aso Tofi o le vaiaso nei na tapunia ai le avanoa mo ni alii ma ni tamaitai talavou e fia tautua i le Matagaluega o Leoleo, Falepuipui ma le Ola Toe Fuataina, a o taulai tapenaga a le matagaluega i le tapenaina o le itu i le puipuiga mo le fono a taitai o Malo o le Taupulega o le a usuia i Samoa i le tausaga fou 2024.

O le tau faaiuiuga o le tausaga na tea nei na faauu ai le vasega fou o leoleo e silia i le 60, ae sa faailoa e le sui Komesina le susuga Papalii Monalisa Tia’i Keti talu ai nei, o loo silasila le pulega i le fia ausia o se aofaiga e tasi le afe ma ona tupu i le fuafuaga agai i le Fono a Malo o le Taupulega e manaomia tele ai leoleo mo le faia o galuega i le puipuiga, ae le tuua ai galuega masani o le tali atu i mataupu tau solitulafono.

O loo sailia nisi leoleo ae lē o taofia ai le faamavae o nisi o Malu o le Malo ona o nisi o fuafuaga tau i le tagata lava ia aemaise o mafuaaga tau i le aiga, o nisi foi ua malaga i galuega faavaitaimi.

E le o faitaulia ai leoleo ua faamalolo ona o mafuaaga i le faatinoga o tiute.