O le Aso Lua o lenei vaiaso ua fuafua e toe faaauau ai le galuega o le suaina o le auala tele o le nuu o Afega i eleele sa tulai mai ai se feteenaiga ma le nuu o Levi Saleimoa i le Aso Faraile na tea nei.
O le taunuuga lea o le feiloaiga na faia i le Aso Gafua o lenei vaiaso i le va o sui o ia afioaga faapea ai ma ni matai o le nuu o Lotoso’a sa faatino i le faamasinoga o fanua ma suafa i Mulinuu, lea sa faatautaia e le Lesitala o Faamasinoga o le Ofisa Sili foi o le pulega o le matagaluega o faamasinoga ma le faafoeina o mataupu tau faamasinoga, le susuga Papalii John Taimalelagi Afele, faapea ni sui lesitala sinia o lea faamasinoga ma le Komesina ma se sui Komesina o le matagaluega o leoleo falepuipui ma le ola toe fuataina.
O se feiloaiga na toe fofogaina ai e le Lesitala o Faamasinoga le faaiuga na taunuu iai le faamasinoga i le va o ni matai o Afega ma Levi Saleimoa i le masina o Me o le tausaga e 1963, lea na faamautu ai le maua e le nuu o Afega o se vaega o eleele o loo tuaoi ai ma Levi Saleimoa.
E lei apiliina e le nuu o Levi Saleimoa lea faaiuga seia vagana le nuu o Tuanai sa latou apiliina peitai e lei talia.
O le talosaga a le nuu o Afega ua fia fua eleele sa aafia i lea finauga na faia iai se suesuega a lea faamasinoga ma faia ai le faaiuga i le aso 14 o le masina na tea nei o Setema e talia lea talosaga ma faia ai le poloaiga ina ia galulue faatasi Afega ma Levi Saleimoa i le faamamaluina o le faaiuga.
Peitai ina ua faia le galuega o le suaina o le auala tele mo le faataotoina o le tuaoi o fanua o le nuu o Afega, na tulai mai ai loa se feteenaiga ina ua faalavelave iai nisi o aiga o Levi Saleimoa.
Na taofia ai le galuega ma saili fofo mo se taotoga filemu o le mataupu e pei ona iai se feiloaiga a sui o ia nuu i le ofisa autu o leoleo i Apia i le Aso Faraile na tea nei.
Peitai o le amataga o lenei vaiaso na toe fālē ai le mataupu i foga a le Malo ma fautuaina ai le tatau ona usitaia le faaiuga a le faamasinoga.
Ua faailoa ai e le Lesitala ma le Ofisa Sili o Faamasinoga o le a faaauau le galuega o le auala e tusa o le faaiuga a le faamasinoga ia Setema, ae tapena itu ua latou faailoa lo latou apiliina o lea faaiuga, e tuuina atu talosaga apili.
Ua fautuaina foi itu o loo aafia i le finauga lenei, o soo se tagata e faalavelave i le galuega, o le a faaaogā loa e leoleo aulape o le tulafono.
I le folasaga a le Komesina o lea matagaluega i le feiloaiga na ia teena ai se tuuaiga e faapea ua togi tupe leoleo na agai e taofi le faalavelave ane o nisi o le nuu o Levi Saleimoa i le suaina o le auala o le tuaoi o fanua o Levi ma Afega.
Na faailoa e le Komesina le susuga Auapaau Logoitino Filipo i le feiloaiga o le tiute o leoleo o le faamalosia o le tulafono e ala i le faaiuga a le faamasinoga ua poloaina ai le faatino o le galuega a le nuu o Afega.
