O le sui faipule o le itumalo palota o Aiga i le Tai le afioga i le Sui Fofoga Fetalai Auapaau Mulipola Aloitafua na tala malae i le saunoaga faalauaitele a sui mamalu o le Palemene i le Tala faatatau autu muamua o le tupe mo le paeaiga lona 17 a le fono aoao faitulafono lea ua soalaupule ina ua maea ona faataatia e le afioga i le tamaitai Minisita o Tupe.
O se tala o le tupe ua fofola mai ai fuafuaga faataoto a le faigamalo fou e ala i le faaititia o nōnōgatupe ae ua iai ma ni faamama avega mo
le atunuu lautele faapea ma pisinisi laiti ma pisinisi feololo. I le silia ma le $985 miliona tala ua fuafuaina e le faigamalo fou e faatino ai lana tala o le tupe muamua o lea ua faailoa nei e le Minisita le ausia ai o se maualuga e 1piliona tala o aitalafu a Samoa i atunuu i fafo ma o le tele o lea aitalafu o le faletupe i totonu o Saina
Taua e le tamaitai Minisita “Lau afioga i le Fofoga Fetalai e ui o loo fuafua le toe faatupulaia lēmū o le tamaoaiga i le 2% i le faaiuga o le tausaga faaletupe 2021-2022 o loo iai le tamaoaiga o Samoa i se tulaga pagātia i le taimi lenei ona o aafiaga o le Koviti.
O lenei tala autu o le tupe ma ona vaega uma e faamoemoe o le a toe faagaioi ai le tamaoaiga o Samoa e ala lea i galuega faatino a le Mālō aemaise faamāmā avega talafeagai o le a mafai ona tuuina sao atu i lima o e ua aafia”.
O loo faaauau pea le fonotaga a le fono aoao faitulafono e pei ona soalaupule ai le tala faatatau autu o le tupe seia oo ina pasia.
O aiaiga o tulafono tumau o le Palemene e pei ona faatu ai se lafo e le tamaitai Palemia ua faaauau ai ona tagofia le tala o le tupe ona e maea i le faaiuga o le masina nei le tolu masina o tupe o loo faasoa mai i aiaiga o le iai o le tatou atunuu i taimi o faalavelave faafuasei.
O le masina fou o loo fuafua e amata ai ona faaoga le tala o le tupe mo galuega a Matagaluega ma Faalapotopotoga tumaoti a le Mālō. O lea manaoga ua mafua ai ona lē tuuina atu le tala o le tupe e soalaupule e le komiti o tupe a le Palemene.
