I le lima tausaga ua tuanai talu ona taofia le galuega o le fausia o le faleaoga tulagalua o le nuu o Vaigaga i le polokalame fesoasoani a le faletupe o le lalolagi, o le vaiaso nei ua faailoa e le sui faipule o Faleata 2 o loo aofia ai le nuu o Vaigaga, o le a amatalia ai lea galuega ma le fuafuaga e tatau ona mae’a ia Aperila o le tausaga fou 2024.
Ua faailoa e le tofa Leatinuu Wayne Soo’ialo i le polokalame o le Tanoa Ava a le Radio Samoa, o se tasi lea o galuega sa aofia i le polokalame i le va o le tausaga e 2016 i le 2017, peitai na taofia.
Ina ua tulai mai le faigamalo ua iai nei, na faaalia e Leatinuu e taunuu atu o loo iai pea le vaegatupe mo le fausia o le faleaoga.
Le tofa Leatinuu Wayne Sooialo o le faipule o le itumalo palota o Faleata 2 ae o le Minisita o le Matagaluega o Faalapotopotoga Tuma’oti a le Malo.
