O le aso muamua o lenei masina fou o Mati le Aso Toonai na te’a nei na aumai ai se pepa o faamatalaga faalaua’itele mai le pulega o le faalapotopotoga o le malosi tau eletise, ua toe faailoa ai galuega ua faatino mo le faaleleia o le faaletonu o le auaunaga tau eletise i le motu o Upolu, ma o le mafua’aga foi lea o le alu ma motusia i nisi o taimi aemaise i le taeao ma le faasolo i le afiafi ona o taimi ia e maualuga ai le mana’oga tau eletise.
Ua faaalia e le faalapotopotoga lo latou lagonaina o le to’atama’i ma le faaseā atu a le atunuu ma e lē o māmā ai i le faalapotopotoga si’ufofoga ua faaleo ai finagalo ua lagomia auā o le latou auaunaga e mo le atunuu atoa.
O le Aso Faraile na te’a nei na amata ai galuega i le ta’iina i luga o pou o uaea malolosi e fesoota’i ai afi eletise i Fiaga ma Fuluasou ma o le vaiaso nei o loo faaauau ai lea galuega.
O nisi o sooga o ia uaea malolosi na sao iai le vai na mafua ai le faaletonu sa motusia atoa ai le eletise i Upolu i le taeao o le Aso Sa ua mavae ma le po o le Aso Lua na te’a nei.
O laina aga’i i Saute ma le itu i Sisifo o Upolu le Southcoast Feeder ma le Westcoast Feeder ua faaalia e le faalapotopotopoga o loo iai aafiaga ma’ale’ale i le motusia faafuase’i i taimi o le 6 i le taeao aga’i i le 11 i le taeao faapea le 6 i le afiafi e oo i le 11 i le po o taimi ia e maualuga ai le mana’oga tau eletise.
O galuega o loo faagasolo e iai le faamoemoe o le faalapotopotoga o le a vave ona foia ai le faaletonu ma’ale’ale i uaea malolosi o loo faia iai le galuega i le taimi nei.
