O le faamauina ai e le Malo o Amerika o se matatia le feiloaiga talu ai nei a taitai o Malo o le Pasefika ma le Peresetene o le Iunaite Setete o Joe Biden, ua faailoa ai e le sui filifilia fou o lea Malo tele e faamautu i Samoa le tamaitai o Noriko Horiuchi, o le a siitia maualuga fesoasoani a lona Malo mo Samoa, e pei ona faamausali ai nei le leoina o ogasami faatulafono o le tatou atunuu e vaaleoleo o le gataifale a le Malo o Amerika poo vaa o le Coast-Guards.

O le fiafia na tapenaina e le ofisa o lea Malo i Samoa e faafeiloai ai le sui fou o Amerika mo Samoa, na faailoa ai lea tulaga ma le saunoaga a Noriko Horiuchi, o le a faatumau ai pea ma sootaga vavalalata o Malo e lua.

O le vaaleoleo o lea Malo le Cutter Oliver Berry sa faia sana malaga taamilo i o tatou ogasami faatulafonoina sa malaga ai ma sui o le Matagaluega o Leoleo ma le Matagaluega o Faatoaga ma Faiga Faiva.

Ua ta’ua lea malaga taamilo e siaki o tatou ogasami a o talia ai se taimi o le tausaga fou e toe maua ai se vaaleoleo e pei o le Nafanua.

O le amatalia o le taimi galue o le sui o le Malo Amerika, o le a galulue faatasi ai ma sui o le Malo o Samoa i taumafaiga e fesoasoani i le itu i le puipuiga ma isi auaunaga ma tautua o loo fesoasoani mai ai le Malo tele o Amerika.