E 4 miliona 600 selau afe tala le aofa’iga o se seleni mai tupe lē fuafuaina a le malo ua fuafua nei e faaalu e toe faaleleia ai faaletonu o le maota faamasino autū i Mulinuu, lea e lē gata o loo avea ma nofoaga autū o le matāgaluega o faamasinoga ae o loo iai ma potu o le faamasinoga o soligatulafono ma le Faamasinoga o Fanua ma Suafa.
Ua faailoa e le Palemia i le feiloa’iga ma tusitala e le’i mae’a le tausaga fou 2026 ua tatau ona mae’a lea galuega o le a toe fono ai le vaega pito i luga o le maota ona ua aafia potu e faia ai faamasinoga ma isi galuega i le tutulu pe a oo ina mamafa ma malosi timuga.
O le maota faamasino na fausia i se fesoasoani a le malo o Saina ua na faameaalofa le 200 afe tālā e amata ai le galuega toe faaleleia o le maota.
O le tausaga e 2010 i le masina o Ianuari na umusa ma tatala aloa’ia ai le maota faamasino i Mulinuu ae i le 15 ai o tausaga talu ona mae’a fausia ua tula’i mai faaletonu e pei ona māfua ai le faai’uga a le Kapeneta e faaaogā le 4 tesimale 6 miliona tālā mai tupe le fuafuaina e faatino ai galuega e foia ai nei faaletonu.
