O le asiasia e le komiti a le Kapeneta o itumalo faapalota e 51 ua i totonu o le poloketi e tasi le miliona tala, na molimauina ai nisi o faaletonu e pei ona faailoa e le tamaitai Minisita o Tupe o loo avea ma sui o le Minisita o Tina ma Tamaitai o loo iai le vaaia o le poloketi.
I le tali a le minisita o tupe le afioga Mulipola Anarosa Ale Molioo, i le tala faaopoopo muamua o le tupe na ia pa’i ai i fesili a sui faipule sa faitioina le poloketi ona o itumalo e sefulu ua ave iai tusi ua logoina ai, e le faamatuuina iai le tasi le miliona muamua, pe a le usitaia ma tausisia taiala ua faataoto atu e le Malo e faatino ai tapenaga uma e pei o ofisa tutotonu o fono faavae.
Na faailoa e le minisita nisi o faaletonu e pei o se ofisa tutotonu ua lisi ai se malumalu tapua’i.
E lei faailoaina e le afioga Mulipola poo ai le itumalo ua faia lea tulaga, ae o lana tali atu i le toe tutulai o nisi o sui usufono ma tuliloa le minisita i fesili e fia malamalama atili ai, na faaalia ai e le minisita o tupe i lona tulaga o le sui minisita o tina ma tamaitai atinae o afioaga ma agafesootai o le asiasiga a le komiti o le fia molimauina poo faaaoga tatau seleni o le lua selau afe tala ua mae’a ona faamatuu muamua.
Ua faailoa foi e le minisita o tupe o le asiasiga a le komiti na faamauina ai, ua 48 itumalo ua iai ofisa tutotonu ae 2 itumalo faapalota e lei iai ni ofisa.
E tasi i Savaii ma le tasi i Upolu ma e lei faailoaina e le minisita poo ai ia itumalo. E 22 itumalo ua fausia ofisa fou, ae 26 itumalo o loo latou lisi nofoaga o loo faafoe ai o latou ofisa tutotonu.
