Tali le Loia Sili i le mataupu o le filifilia ai o le Sui Peresetene o le faamasinoga o Fanua ma Suafa a Samoa lea na faatino i nai vaiaso ua tuanai. 

I ripoti a le Samoa Observer na faailoa ai e le afioga Su’a Hellene Wallwork o le Komisi o loo gafa ma le vaega tutoatasi a le faamasinoga o Fanua ma suafa LTC e le’o lava se malosiaga  faaletulafono a lea vaega e faia ai ni faaiuga e pei o le filifilia o tagata faigaluega i lea tofiga. 

E pei ona silafia o le Komisi o Faamasinoga o Fanua ma Suafa o loo lagolago malosi i le filifilia ai o Faimalomatumua Mathew Lemisio o lē sa tulai mai i le tofi Komesina o Faigapalota e avea ma Sui Peresetene o le Faamasinoga o Fanua ma Suafa o se tofiga fou. O lea tofiga e le’i faasalalauina ma e le’i faailoa foi i le Minisita o Faamasinoga fuafuaga i lea tofi fou ae poo ai foi ua filifilia e tauaveina. 

I manatu faaalia i le va o le Loia Sili ma le Komisi na faailoa ai e leai se malosiaga a le Faamasinoga o Fanua ma Suafa i mataupu faapea o le filifilia sa’o e i latou e aunoa ma se fautuaga a vaega o le tulafono. 

Ua fautuaina ai e le faufautua a le Mālō le Komisi  e manaomia se lagolago mai se isi vaega ina ia mafai ona o latou faia lenei faaiuga.