O se tasi o tina mai le komiuniti a Samoa i totonu o Ausetalia ia Ivy Tafa na faaali lona lē fiafia i se tulaga na tula’i mai i le faamanatuina o le Fu’a i Brisbane Ausetalia ina ua lē amanaia e i latou na tapenaina lea faamoemoe le auai atu a le Tausala o Samoa le tamaitai ia Haylanni Pearl Mataupu Kuruppu.
I se faatalatalanoaga a le C-TV Melbourne & Hard Talk with Canada ma le tina ia Ivy na faailoa ai e Ivy latou te lei iloa o loo iai le Tausala o Samoa i le faamoemoe i totonu o Brisbane i le amataga o le vaiaso ae ina ua faailoa mai e fai le siva a le Tausala o Samoa na o latou faapea uma o Haylanni peitai e mo’emo’e atu le tamaitai e le o le Tausala o Samoa.
Ta’ua e Ivy o lea tamaitai sa ia faia le sash “Miss Samoa Australia” ma le pale o le tamaitai sa faapaleina i le Tausala a Ausetalia i le tausaga 2019 ae ua tuu le Miss Samoa sa’o na faapaleina atu i Samoa i lenei tausaga.
O le tulaga faanoanoa e pei ona faailoa e Ivy ua alu le tina matua o ia sa faauluulu iai tapenaga o lea faamoemoe ia Galumalemana Koleka ma fai i le Tausala o Samoa 2022-2023 ia Haylanni e aveese lana sash ma lona pale ae faaaoga le latou Miss Samoa Ausetalia mai le tausaga 2019.
Ua faaali foi le faanoanoa tele o le toatele o tagata i luga o upega tafailagi ona o lenei mataupu na tulai mai i le vaiaso nei i totonu o Brisbane i Ausetalia.
E ui i lea mataupu ae sa faailoa foi e Ivy le matagofie o le tele o tapenaga o le fu’a i Brisbane, tele fuafuaga na faataunuuina lelei ma o se polokalame mataina tele.
