Na lē talia e le faamasinoga maualuga i le masina o Mati le talosaga a Ioelu Mamea e tatala i tua i ni aiaiga e faatali ai lona faamasinoga, i moliaga o le fasioti tagata faamoemoeina, umia o se auupega matautia ma le tau’ai maa.
Peitai o lea ua talia lana talosaga e toe iloilo lea faaiuga ma ua tatala i tua i le tuanai o le fā masina o nofo taofia i le vaaiga a leoleo e faatali le masina o Setema o le tausaga nei e valaau ai molimau a leoleo e lagolago ai ona moliaga.
O le Aso Lua i le faaiuga a le faamasinoga o talosaga apili a le faamasinoga maualuga na talia ai le talosaga a lana loia o Josephine Fuimaono Sapolu, ma faailoa ai e le loia ua faaui i tua e leoleo le moliaga o le fasioti tagata faamoemoeina ae suia i le fasioti tagata pa’ivalea.
O le tatala i tua o Ioelu ua tuu iai ma aiaiga e nofo i Aleisa i lona tuafafine, ma ua faasā ona ia umia se masini faatekonolosi e pei o se telefoni feaveai, poo isi masini o fesootaiga.
Ua matuā tapu foi ona fesootai i ni molimau a leoleo.
Ua faasā foi ona fesootai i lana fanau ma ia taofia lona tusifolau i le faamasinoga.
