Ua saunoa Dr Nikki Turner mai le nofoaga autu faufautua i mataupu tau tuipuipui i le Iunivesite o Aukilani, o le tulaga o iai tuipuipui mo tamaiti i faaitu e pei o Aukilani i Saute o loo faaauau pea ona iai i se tulaga lē lelei ma e ono iai ni ona aafiaga ogaoga.

Fai mai le fomai o le misela e mafai ona pepesi faapei o le sosolo a le afi ma e pau le tulaga e maua ai se mapusaga o le faia o tuipuipui ia pe ua mae’a foi ona aafia ai.

Lipotia i le One News i le asō le faatalanoaga ma Turner ua faailoa ai o le faafitauli ona o tulaga na iai tuipuipui o le fanau a o laiti sa maualalo lea aofaiga aemaise o le toatele o isi tagata e lei faia ni tuipuipui a o laiti.

O faamaumauga mai le matagaluega o le soifua maloloina ua faailoa ai o le piliota mai le aso 1 o Iulai ma le 30 o Setema i le tausaga talu ai, e 65 pasene o tamaiti i Counties Manukau sa faia uma tuipuipui i le oo atu i le tai 6 masina le matutua.

O le pepesi o le misela i le 2019 ua iloa ai le silia ma le 2 afe o cases sa faamauina i le atunuu atoa.