Fai mai e 11 afe avanoa faigaluega a le kamupani a le Vodafone o le a aveesea i totonu o le tolu tausaga ona o se tasi o ana fuafuaga mo le toe faaolaolaina o le tulaga tau tupe o le kamupani i le mae’a o tausaga e le o lelei lava le performance. 

Ua faailoa mai o galuega o le a aafia ai le ofisa i le UK ae le o Ausetalia ona e umia ese e le TPG Telecom.

Na faamaonia e le Ofisa Sili o le Vodafone Margherita Della e le o lelei atoatoa le faatinoina o le auaunaga a le kamupani mai tausaga ua tuanai atu nei ma o le a faia ai ia suiga ina ia toe faafoi le auaunaga i le tulaga sa masani ona iai.

E 20 tausaga talu ai o le Vodafone le kamupani aupito tele sa iai o telefoni feaveai ma e 21 atunuu o loo iai a latou auaunaga ma isi ofisa o loo faagaioia e local operators.

E 104 afe tagata e faafaigaluega a le Vodafone i o latou ofisa i le lalolagi atoa e pei ona faailoa i le lipoti faaletausaga a le kamupani.