Ua faailo le faatupula’ia o popolega o sui o le auaunaga o le soifua mālōlōina, i le ono faateteleina o aafiaga o le pepesi ai o le faama’i o le misela i lenei vaitau nai lo o le tausaga e 2019.
O lea ua faamaonia mai le maua ai o se isi ua aafia po ua maua i le faama’i o le misela mai le a’oga maualuga a tamaita’i le Wellington Girls’ College.
Ma ua faamauina ai le faasolo o fesoota’iga a le soifua mālōlōina ma ē na fesoota’i atu i lē ua aafia mo nisi o siaki ma iloiloga o o latou soifua mālōlōina poo iai se isi ua faalogoina ni āuga o le faama’i.
Ua faamauina talu ai o le aafia ai o nisi o le a’oga maualuga i Ueligitone, e faitau selau fanau a’oga ua faamālōlō i le fale a o faasolo siaki o a latou tuipuipui.
O lea ua faaalia ai popolega a le alii polofesa ia Michael Baker i le pepesi o le faama’i, a o maitauina pea le pa’ū maualalo ai o le numera o ē ua fai tuipuipui o le misela.
Ta’ua e Baker o lona iloa e fai lava sina telē o le aafiaga i le pepesi o le misela ma e ono iai Niu Sila i tulaga o faalavelave faafuase’i ona o le faama’i pe a lē vave faatino iai se galuega.
Ua upuia foi e le alii polofesa le malo, talu ai le latou faai’uga e faapea e le’i tau moomia fua le avatu ai o faamaumauga o tuipuipui o fanau a’oga o a’oga maualuluga, ma o le a vaaia ai le faigatā ona māta’itūina ma iloa tamaiti e le’i faia tuipuipui mai ē ua uma ona fai.
Ma a faatusatusa atu i atunuu e pei o Ausetalia, Kanata, Amerika, ma le malo o Peretania o loo tumau pea le faatino ai o resitala ma faia siaki o tuipuipui o fanau a’oga ma e tatau ia Niu Sila ona faata’ita’i iai.
Faaalia e se tasi o tinā i Ueligitone, na ia ta’ua ua popole lava mo si ana tama ma ua lē ave ai lava i nofoaga faitele ona o le fefe ina ne’i maua le isi ana tama i lenei faama’i mata’utia.
Mo le silafia, o le tausaga e 2019, na faamauina e 2000 tagatānuu na aafia i le misela i totonu o Niu Sila, e pei ona māua le faitau selau o tagata na faataotolia i le falema’i.
Puna o Faamatalaga: https://www.rnz.co.nz/news/national/577148/potential-for-measles-outbreak-to-be-worse-than-2019-prof-michael-baker-says
